लन्डन, ११ जुलाई २०२६
अन्तर्राष्ट्रिय नेपाली साहित्य समाज (अनेसास) बेलायत शाखाको आयोजनामा लन्डनस्थित ‘टेस्ट अफ पर्सिया’ रेस्टुरेन्टमा एक भव्य साहित्यिक समारोह सम्पन्न भएको छ । कार्यक्रममा २१३औँ भानुभक्त आचार्य जयन्ती तथा ९५औँ ईश्वर प्रसाद मानन्धर जयन्ती मनाइनुका साथै ‘सुप्रमा–ईशप्रमा अन्तर्राष्ट्रिय पुरस्कार २०२६’ समर्पण र तीन नयाँ कृतिको लोकार्पण समेत गरियो ।
समारोहमा डा. रूपक श्रेष्ठद्वारा लिखित दुई मुक्तक सङ्ग्रहहरू ‘चौशूल’ र ‘पोक्तक’ तथा सुमल कुमार गुरुङद्वारा लिखित युद्ध उपन्यास ‘कर्मवीर’ को संयुक्त रूपमा लोकार्पण गरिएको थियो ।
उक्त कार्यक्रममा अनेसास बेलायत शाखाका अध्यक्ष राज श्रेष्ठको सभाध्यक्षतामा सम्पन्न उक्त कार्यक्रमको सञ्चालन मिडिया प्रबन्धक कुमार केसीले गरेका थिए । उनले डा. रूपक श्रेष्ठको नवप्रकाशित कृति ‘चौशूल’ का केही मुक्तकका हरफहरू वाचन गर्दै कार्यक्रमको सुरुआत गरेका थिए । अनेसास तथा नेप्रमु युकेकी उपाध्यक्ष प्रतिमा केसी ‘प्रवासी’ ले स्वागत मन्तव्यद्वारा उपस्थित सबैलाई स्वागत गरेकी थिइन् ।
कार्यक्रमका प्रमुख अतिथि नेपाल मुक्तक प्रतिष्ठानका केन्द्रीय अध्यक्ष रामकाजी कोने हुनुहुन्थ्यो भने विशिष्ट अतिथिहरूमा प्रा. डा. देवी प्रसाद सुवेदी तथा प्रा. डा. सूर्य प्रसाद सुवेदी (OBE) रहनुभएको थियो । विशेष अतिथिहरूमा पूर्व सुप्रमा पुरस्कार विजेता तथा प्रतिष्ठित स्रष्टाहरूको उपस्थिति थियो । कृष्ण बजगाईँ (कवि, नियात्रा तथा आख्यानकार), प्रतिमा केसी ‘प्रवासी‘ (मुक्तककार, पत्रकार तथा उपाध्यक्ष, अनेसास/नेप्रमु युके) डा. सुमाया राई (कवि तथा साहित्यकार),केदार सङ्केत (कवि तथा यात्रास्पर्शकार), माया गुरुङ (कवि, समाजसेवी तथा उपाध्यक्ष, अनेसास),प्रा. डा. चाड म्यानियन रहनु भएको थियो ।
कार्यक्रममा कवि, साहित्यकार तथा समाजसेवी सुमल कुमार गुरुङले आदिकवि भानुभक्त आचार्यको ‘घाँसी’ कविताको चर्चा गर्दै नेपाली साहित्यमा उनको योगदान र स्व. ईश्वर प्रसाद मानन्धरप्रति श्रद्धासुमन अर्पण गर्नुभयो ।
सो समारोहमा ‘सुप्रमा–ईशप्रमा अन्तर्राष्ट्रिय पुरस्कार २०२६’ समर्पणका क्रममा डा. रूपक श्रेष्ठले पुरस्कारको पृष्ठभूमि, स्व. ईश्वर प्रसाद मानन्धरको साहित्यिक योगदान, उद्देश्य र स्थापना कालदेखि आजसम्मको मार्गचित्र (रोडम्याप) माथि विस्तृत प्रकाश पार्नुभयो ।
विशिष्ट अतिथि प्रा. डा. सूर्यप्रसाद सुवेदी (OBE) ले आफ्नो शुभकामना मन्तव्य राख्दै यस वर्षको पुरस्कारबाट सम्मानित व्यक्तित्व प्रा. डा. देवी प्रसाद सुवेदीको लेखकीय आयाम र उनको साहित्यमा वेदहरूको ज्ञान तथा प्रभावबारे चर्चा गर्नुभयो । साथै, उहाँले अनेसास बेलायत शाखाले नेपाली भाषा र साहित्यको उत्थानका लागि पुर्याएको अतुलनीय योगदानको उच्च प्रशंसा समेत गर्नुभयो ।
कार्यक्रममा भाग लिनका लागि साहित्य प्रेमी तथा मुक्तककार भोजराज नेपाली लन्डनबाट २५ किलोमिटर साइकल यात्रा तय गरेर कार्यक्रममा सहभागी भएका थिए, जसलाई कार्यक्रममा विशेष चासोका साथ हेरिएको थियो।
